"أنا مشغول" كذبة.. أنت مو مشغول، أنت قررت الانشغال بالأشياء الخطأ
"أخبارك؟"
"والله مشغول مرة، ما أفضى أحك راسي."
لماذا تشعر انك مشعول طوال الوقت دون انجاز حقيقي؟
كلنا مشغولين، بس الغريب إننا مشغولين ونفتح نتفلكس 3 ساعات، مشغولين ونقعد في المقهى ساعتين نسولف، مشغولين ونشوف ستوري كل الناس اللي نعرفهم واللي ما نعرفهم.
الحقيقة أنت مو مشغول، أنت بس اخترت تكون مشغول بأشياء ما تقدمك ولا تأخرك، عشان تهرب من الشغل الحقي اللي يخوفك.
الانشغال صار موضة
من متى صارت كلمة "مشغول" مدح؟
أول كانت عذر تعتذر فيه لو ما رديت. تقولها وانت محرج. الحين صارت فخر. تقولها بكل اعتزاز كأنك تملك شركة من 500 موظف.
صرنا نخاف نكون فاضين. لو أحد سألك وش تسوي نهاية الأسبوع؟ وقلت "ولا شي"، تحس إنك فاشل. لازم تكون عندك قائمة مهام، اجتماعات، مشاوير، حتى لو كلها كلام فاضي. المهم تبان مشغول.
المشكلة؟ الانشغال بدون إنجاز معناه دوران في نفس المكان. زي اللي يركض على جهاز المشي. تعبان، وتعرق، بس ما تحركت متر واحد.
الانشغال يعطيك إحساس زائف إنك منتج. تحس إنك تسوي شيء، بس في الحقيقة أنت تهرب من الشيء اللي فعلاً بيغير حياتك.
تعبان طول اليوم وإنجازك صفر
الفرق بين المشغول والمنتج فرق سماء وأرض.
المشغول: يرد على 50 إيميل، يحضر 4 اجتماعات، يرد على قروبات الواتساب. آخر اليوم طايح من التعب، بس لو سألته وش أهم شي أنجزته اليوم؟ ما راح يعطيك إنجاز حقيقي.
المنتج: ممكن يشتغل 3 ساعات بس، بس يخلص المهمة اللي بتقدمه شهر كامل لقدام. يقفل جواله، يكنسل الإيميلات، ويركز على شي واحد يغير المعادلة.
كلنا نعرف واحد يداوم 12 ساعة وينام في المكتب، وراتبه ما تغير من 5 سنين. ونعرف واحد ثاني يخلص شغله في 4 ساعات ويطلع، وكل سنة في منصب جديد.
الفرق مو في الساعات. الفرق في وش تسوي في الساعات.
أكبر كذبة نعيشها: "إذا اشتغلت أكثر، بتنجح أكثر". وهذا غير صحيح. لكن إذا اشتغلت على الشي الصح، بتنجح أكثر، حتى لو جلست 4 ساعات فقط.
لو تجلس تكنس الصحراء 20 ساعة يومياً، ما بتنظفها. لكن لو جبت خرطوم ماء وشغلته ساعة، بتخلصها.
اختبار بسيط يكشفك قدام نفسك
بعيدًا عن التنظير، هذا اختبار يكشفك في 10 ثواني:
تخيل عطيتك بكرة 5 ساعات فاضية تماماً. لا دوام، لا عائلة، لا جوال، لا أحد يزعجك. بس أنت ومكتبك.
وش بتسوي؟
لو جوابك كان "مدري" أو "بشوف وقتها"، فأنت مو مشغول. أنت بس تستخدم كلمة "مشغول" عذر عشان ما تواجه المهمة الثقيلة اللي مأجلها من شهور.
المشروع اللي خايف تبدأ فيه. الكتاب اللي خايف ما تفهمه. المكالمة اللي خايف تسويها. الدورة اللي خايف ما تكملها.
الانشغال صار بطانية نتغطى فيها عشان ما نحس ببرد التقصير.
أنت مو مشغول، أنت تتجنب
خل نكون صريحين. ليش ما تبدأ؟
لأن البداية ثقيلة. لأنك خايف تفشل. لأنك خايف يطلع شغلك سيء. فبدل ما تواجه الخوف هذا، تهرب للشيء السهل.
فتح ستوري والتعليق عليه كأنه امر الزامي رغم انك ممكن تلقى من ورى تعليقك هذا مشكلة صار أسهل من فتح ملف المشروع. الرد على قروب واتساب والدخول بنقاشات ما لها اي فايدة صار أسهل من كتابة تقرير. مشاهدة فيديو "كيف تنجح" أسهل من إنك تطبق اللي في الفيديو.
وكثير من الناس يضيعون ساعات طويلة في النقاشات والردود والتعليقات اللي ما تضيف شيئ لحياتهم أو أهدافهم. إذا كنت مهتم بمعرفة كيف يمكن للصمت أن يحمي وقتك وطاقتك ويجنبك الكثير من المشاكل، اقرأ: لماذا يكون الصمت أحيانًا أقوى من الكلام؟ وكيف تتجنب مشاكل التعليق والجدال؟.
المشكلة إنك تعودت على هذا الهروب. صار عادة. وكل ما أجلت، صار الموضوع أثقل في راسك.
والأسوأ إنك تبدأ تصدق كذبتك. تقنع نفسك إنك فعلاً مشغول، وإن الظروف ضدك، وإن الوقت ما يساعد.
الحل: وقف كلمة "مشغول"
من اليوم، كل مرة بتقول "والله مشغول"، وقف واستبدلها بجملة أصدق: "هذا مو أولوية عندي".
جرب تقولها بصوت عالي:
"والله قراءة الكتب مو أولوية عندي"
"والله صحتي مو أولوية عندي"
"والله تعلم الإنجليزي مو أولوية عندي"
تحس بثقلها؟ ممتاز. لأن "مشغول" كلمة سهلة تعفيك من المسؤولية. بس "مو أولوية" تجلدك وتخليك تواجه الحقيقة: أنت اخترت.
أنت قررت إن مسلسل 3 ساعات أهم من مستقبلك. أنت قررت إن السوالف في المقهى أهم من مشروعك. أنت قررت إن راحة اليوم أهم من راحة 5 سنين جاية.
لما تغير لغتك، يتغير تفكيرك. ولما يتغير تفكيرك، يتغير فعلك.
كيف تصير منتج بدل مشغول؟
الموضوع ما يحتاج معجزة. يحتاج وضوح وقسوة بسيطة على نفسك.
1. حدد 3 أشياء فقط في الأسبوع:
لا تكتب 20 مهمة. اختر 3 أشياء لو خلصتها، بتقول "الأسبوع هذا ما راح على الفاضي". الباقي خله يطيح.
2. اقفل المشتتات وقت الشغل:
جوالك برا الغرفة. إشعارات مقفلة. 90 دقيقة تركيز كاملة تساوي 6 ساعات شغل متقطع.
3. ابدأ بالأثقل:
أول ما تجلس، سو المهمة اللي تكرهها أكثر شيء. لأنك لو أجلتها، بتاكل راسك بقية اليوم.
4. راقب وقتك يومين:
اكتب كل شيء تسويه لمدة يومين. بتصدم لما تشوف وين تروح ساعاتك.
الناس الناجحة ما عندها وقت أكثر منك. الفرق إنهم يختارون معاركهم صح.
ثمن التشتت غالي
التشتت ما يسرق وقتك بس. يسرق ثقتك بنفسك.
كل مرة تأجل المهمة الثقيلة، ترسل رسالة لعقلك الباطن: "أنا ما أقدر". ومع التكرار تصدقها.
وبعد سنة تلقى نفسك في نفس المكان. نفس الشغل، نفس الراتب، نفس الإحساس بالذنب آخر الليل.
وفي المقابل، الشخص اللي ركز على شيء واحد لمدة سنة، صار خبير فيه. الفرق بينهم مو ذكاء، الفرق تركيز.
الخلاصة
بيل جيتس وإيلون ماسك وأنت. كلنا عندنا 24 ساعة. محد عنده 25.
الفرق الوحيد إن فيه ناس تصرف الـ24 ساعة على أشياء تغير حياتها بعد سنة، وناس تصرفها على أشياء تنساها بعد ساعة.
بطل تقول "ما عندي وقت". قول "ما عندي أولويات صح". وبعدها إما تعدل أولوياتك، أو تصالح مع النتيجة ولا تشتكي.
الوقت ما يرجع. والسنة الجاية بتجي سواء اشتغلت أو ما اشتغلت. السؤال: وين بتلقى نفسك وقتها؟
سؤال لك: لو حذفت 3 أشياء تافهة تسويها يومياً، وش الشي المهم اللي كان ممكن تنجزه بدالها هذا الشهر؟
تعليقات
إرسال تعليق
شكرا لمنحي جزء من وقتك الثمين