لماذا الصمت أحيانًا أقوى من الكلام؟ وكيف تتجنب مشاكل التعليق والجدال؟
متى آخر مرة سكت وربحت؟
متى اخر مره شفت نقاش حاد في قروب الاصدقاء او قروب العائلة وقررت تسكت؟ صعبة، صح؟ تحس ان فيه شي يشدك ويقول لك لازم ترد، لازم توضح، لازم تصحح. حتى لو الموضوع ما يخصك ولا الكلام يشملك او موجه لك.
صرنا مبرمجين بطريقة غريبة. يجي إشعار، نفتحه، نشوف سالفة، ولازم نحط تعليق. نحط رأي، ننتصر لوجهة نظرنا، نصحح المعلومة، ندافع عن الفريق اللي نشجعه. كأننا لو ما تكلمنا بنختفي من الوجود. كأن السكوت اعتراف إننا ما نعرف أو ما ندري، وكأن "ما أعرف" صارت كلمة عيب في مجتمعنا.
يعتقد كثير من الناس أن الصمت ضعف، لكن الحقيقة أن الصمت في بعض المواقف يكون أقوى من الكلام. فاختيار الوقت المناسب للكلام أو السكوت يساعد على تجنب الخلافات وتحسين العلاقات واتخاذ قرارات أكثر حكمة، ولهذا يعتبر الصمت أحيانًا علامة على القوة والحكمة وليس على الضعف.
بس وقف لحظة وحاول تحسبها صح. امسك ورقة وقلم لو تبغى. اكتب آخر 5 نقاشات دخلت فيها الأسبوع هذا. كم واحد منها قدمك خطوة لقدام؟ وكم واحد خلاك تضيع ساعة وانت معصب وتفكر في الرد؟
والأهم: كم مرة ندمت لأنك تكلمت؟ وكم مرة ندمت لأنك سكت؟ لو كنت صادق مع نفسك، بتلقى إن النسبة مخيفة. إحنا غالبًا نندم على كثير من الكلمات التي نقولها وقت الانفعال أكثر مما نندم على لحظات كان المفروض نتكلم فيها لكن اختارنا الصمت. لأن السكوت ما يترك أثر، لكن الكلمة تنحفر.
الجواب عندك. وأنت أدرى بنفسك من أي أحد.
صرنا نحس إننا تافهين وعقولنا فاضية لو ما علقنا
الخوف من الفوات ما عاد بس على حفلة أو عرض أو سفرة. صار حتى على الكلام. صار عندنا خوف مرضي إننا نفوت فرصة نثبت فيها وجودنا.
لازم أكون موجود في كل نقاش. لازم رأي يوصل. لازم العالم يعرف موقفي من مباراة أمس، ومن تصريح الوزير، ومن أزمة الدولار، ومن طبخة خالتي أم أحمد. لازم أبين إني متابع، إني فاهم، إني ما أنضحك علي.
المشكلة إن عقلك له طاقة محدودة زي بطارية الجوال. كل تعليق تكتبه، كل هواش تدخله، كل نقاش تافه تنتصر فيه، يسحب 2% من البطارية. أنت ما تحس، بس آخر اليوم تلقى نفسك على 5%.
وتجي للشغل المهم اللي بيغير حياتك، لمشروعك اللي مأجله من شهور، لمذاكرة ولدك، لجلسة مع زوجتك، وتلقى نفسك منهك ومرهق ومافيك طاقة حتى تبتسم. صرنا ندفع ضريبة التواجد من راحتنا النفسية، ومن علاقتنا مع نفسنا، ومن إنتاجيتنا.
أنا أعرف واحد كان عنده مشروع صغير يبي يبدأه. كل يوم يجلس ساعتين يخطط ويكتب. بعد ما دخل تويتر صار نفس الشخص يجلس ساعتين يرد على الناس ويتشاجر في الكومنتات. بعد 6 شهور سألته وش صار على المشروع؟ قال والله ما فضيت. وهو فاضي طول الوقت، بس فاضي في المكان الغلط.
فاتورة الكلام المجاني غالية
الكلام ببلاش. تكتب وتعلق وترد ما أحد يحاسبك بالحرف. لكن نتائجه مو ببلاش أبداً.
تذكر آخر مرة رديت على مديرك وأنت معصب في إيميل؟ حتى لو ما أرسلته، مجرد إنك كتبته خلاك تفقد تركيزك بقية اليوم. تذكر آخر مرة رديت على تغريدة استفزتك ودخلت في نقاش مع حساب وهمي؟ ضيعت ساعة، وفي النهاية حظرك وطلع كسبان. تذكر آخر مرة دخلت نقاش مع ولد عمك في قروب العائلة وقلبت جد، وصار أسبوع ما تكلمونه بعض؟
كم علاقة توترت بسبب تعليق ما كان له داعي؟ كم صديق قديم باعدت بينك وبينه تغريدة؟ كم شخص شال في خاطره وما قالك، لكنه غير نظرته لك للأبد؟ كم فرصة وظيفية طارت لأن صاحب العمل بحث اسمك في قوقل ولقى تعليقك على موضوع تافه وقال هذا ما ينفع معنا؟
أسوأ قراراتنا المالية والعائلية والمهنية ما تجي بعد دراسة وتخطيط. تجي في لحظة انفعال. لحظة قررنا نعلق فيها قبل ما نفكر 10 ثواني. الكيبورد خفيف، والضغط على زر الإرسال أسهل من شرب الماي. بس اللي تكتبه ينحفر في ذاكرة الناس. والناس تنسى 90% من اللي قلته، بس مستحيل تنسى الـ10% اللي جرحتها فيها أو اللي بينت فيها إنك متسرع.
هل الصمت ضعف أم قوة؟
من صغرنا وهم يربوننا على إن الساكت ضعيف، واللي ما يرد حقه مهزوم. لازم تبين إنك فاهم، لازم ترد فوراً، لازم تسجل موقفك، لازم تاخذ حقك أول بأول قبل لا يضيع.
بس الواقع يقول عكس كذا تماماً. الأقوياء الحقيين هم اللي يختارون معاركهم بعناية. الجندي الذكي ما يدخل كل معركة يشوفها. يدخل المعركة اللي يربحها، ويتجنب المعركة اللي تخسره حتى لو ربحها.
الصمت مو ضعف. الصمت استراتيجية. الصمت سلاح بارد يخلي اللي قدامك يغلط وهو ما يدري.
متى السكوت يخليك تربح؟
أولاً: في النقاش العقيم.
تعرف النوع هذا من الناس؟ يتكلم عشان يثبت إنه صح، مو عشان يوصل للحق. مهما جبت أدلة، بيغير الموضوع. في هذه الحالة سكوتك يحرق أعصابه ويحفظ هيبتك.
ثانياً: لما تكون معصب.
الغضب يخليك أغبى شخص في العالم لمدة 10 دقايق. أي كلمة تقولها وأنت مرتفع ضغطك، بتندم عليها وأنت رايق. أجل الرد لبكرة وبتشوف 90% من المشاكل تختفي.
ثالثاً: عشان تسمع صح.
ما تقدر تسمع وتتكلم في نفس الوقت. أحياناً أقوى رد هو "حاول تشرح لي أكثر". هذي الجملة تخلي اللي قدامك يكشف كل أوراقه وأنت ما حرقت ولا ورقة.
رابعاً: عشان كلمتك يصير لها وزن.
لو أنت تعلق على كل شي، كلامك يصير مثل الزحمة في الشارع. ما أحد يسمعه. لو تتكلم قليل، الناس بتسكت وتسمع لما تفتح فمك.
خامساً: عشان تحافظ على طاقتك.
كل نقاش تدخله يسرق منك تركيز. النقاشات الحادة غالبًا تستنزف التركيز والطاقة الذهنية وتحتاج لفترة عشان ترجع لتركيزك الطبيعي بعد انتهائها. الناس الناجحة بخيلة جداً في طاقتها.
الصمت في الشغل والعلاقات
في الشغل، اللي يتكلم كثير غالباً ما ينجز كثير. أما الشخص الثقيل، اللي ما يتكلم إلا إذا عنده شيء مهم، هذا اللي يترقى. المدير يثق في اللي يسمع، يفهم، وبعدين يعطيه حل واحد يختصر عليه أسبوع شغل.
في العلاقات، كثير من الخلافات الزوجية تتفاقم بسبب كلمات قيلت وقت غضب وما انمسحت من الذاكرة. الزوج اللي يتعلم يسكت وقت الزعل، بيته يستمر. هذا مو ضعف شخصية، هذا ذكاء اجتماعي.
كيف تتدرب على السكوت؟
الخطوة الأولى: قاعدة الـ10 ثواني.
قبل ما تكتب أي تعليق أو ترد على رسالة استفزتك، عد من 1 إلى 10 في سرك. 90% من الردود بتختفي لوحدها.
الخطوة الثانية: اسأل نفسك سؤالين.
وش بأستفيد لو تكلمت؟ وش بأخسر لو سكت؟ لو الإجابة "ولا شي"، خلاص سكر الموضوع.
الخطوة الثالثة: امسح التطبيقات اللي تسرقك.
شيل تطبيقات تويتر وانستقرام من الجوال. خليها في المتصفح بس. بيقل استخدامك 70% بدون ما تحس.
الخطوة الرابعة: عوض الصمت بشيء مفيد.
الفراغ يرجعك للعادة القديمة. فلو سكتت عن النقاش، روح اقرأ صفحة من كتاب، اكتب فكرة في مشروعك، اتصل على أمك.
الخلاصة
إحنا عايشين في زمن كل الناس تصارخ عشان تنسمع. وفي هذا الزمن بالذات، اللي يسكت هو اللي ينشاف فعلاً. قبل لا تدخل أي نقاش، اسأل نفسك سؤال واحد بصدق: وش بأستفيد لو تكلمت، ووش بأخسر لو سكت؟
كلمتك غالية. غالية جداً. لا ترخصها في معارك مجانية مع ناس ما راح يفيدونك ولا يضرونك لو اختفيت من حياتهم بكرة.
سؤال لك: وش أول موقف تندمت فيه لأنك ما سكت؟
تعليقات
إرسال تعليق
شكرا لمنحي جزء من وقتك الثمين