الوظيفه التي لن يستبدلها الذكاء الاصطناعي
الكل يسأل نفس السؤال من يوم ما طلع ChatGPT واللي مثله: هل الذكاء الاصطناعي بياخذ شغلي؟
خلني أريحك من البداية. هو ما بياخذ وظيفتك بالكامل. لكنه بياخذ الجزء الممل منها، الجزء اللي تعتبره مجرد مهمة وتخلصها وأنت سرحان. وهنا يجي الفرق اللي يحدد مين بيكمل ومين بيختفي.
وش الفرق بين المهمة والوظيفة؟
المهمة شيء مكرر، واضح، له خطوات محددة. تعبي جدول إكسل، تلخص إيميل طويل، تعدل صورة، ترد على استفسار روتيني. هذي الأشياء خلاص راحت لـ AI وبيسويها في 3 ثواني وأنت تشرب قهوتك وتفكر في الشي الجاي.
أما الوظيفة فهي شي ثاني تماماً. الوظيفة فيها ناس، فيها علاقات، فيها قرارات مصيرية، فيها ظروف ما أحد يتوقعها ولا انكتبت في دليل استخدام. فيها موقف يجيك اليوم ويتغير بكرة. هذي منطقتك أنت. هذي المنطقة اللي الآلة ما تقدر تدخلها لأنها ما تفهم البشر ولا تخاف على سمعتها.
فكر فيها كذا: الإكسل ما أنهى مهنة المحاسبة. بالعكس، خلّى المحاسب يوقف عن الشغل اليدوي ويصير مستشار مالي يفهم الأرقام ويعطي قرار. الذكاء الاصطناعي بيسوي نفس الشي مع كل الوظائف. بيشيل عنك الغبار عشان يمديك تشتغل في اللب.
أربع أنواع وظائف AI ما يقرب منها
1. وظائف تباع فيها الثقة، مو الخدمة
تخيل تروح لمحامي. أنت ما تدفع له عشان يكتب عقد في الوورد. أي سكرتيرة تقدر تسويها. أنت تدفع عشان تنام وأنت متطمن إن العقد هذا يحميك لو صار خلاف. تدفع عشان عنده خبرة 20 سنة في المحاكم وعارف الثغرة اللي القاضي بيمسك عليها.
نفس الشي مع الدكتور. المريض ما يبغى تشخيص من جهاز يقول له نسبة 87% إن عندك التهاب. هو يبغى دكتور يطالعه في عينه، يسمع صوته وهو متعب، ويقوله بلهجة مطمئنة "انت بخير، بس ارتاح يومين". الثقة عملة بشرية فقط. ما تنشحن، ما تتنسخ، ما تتبرمج.
أي وظيفة تعتمد على إن العميل يأمنك على ماله، صحته، سمعته، مستقبله، بتظل بشرية. لأنك لو غلطت، عندك اسم تخسره. الآلة ما عندها اسم تخاف عليه.
2. وظائف إدارة الكوارث اليومية
الخطة على الورق دايماً حلوة. الجدول الزمني مرتب، الميزانية مظبوطة، الفريق متفق. لكن الواقع فيه مشاكل يومية ما تنكتب في الكتاب. المورد تأخر عن التسليم، الفريق صار فيه خلافات شخصية، المدير صحى الصبح وغير رأيه 180 درجة، العميل طلب تعديل مستحيل في آخر لحظة.
AI ممتاز في المهام الواضحة والبيانات المنظمة، لكنه ما زال يحتاج إشرافا بشري اذا وصلنا الى ضرورة التعامل مع مواقف معقدة أو مواقف متغيرة باستمرار. لانه بكل بساطة ما عنده "حس" يقول له وش أهم شيء الحين؟ وش أقدر أضحي فيه؟ وش أقول للعميل عشان يهدى؟
الإنسان هو اللي يعرف يتصرف لما ما فيه كتالوج للحل. هو اللي يتصل على المورد الساعة 11 الليل ويقنعه. هو اللي يجمع الفريق ويحل الخلاف بكلمة. هو اللي يقرر يخسر جزء من الربح عشان يحافظ على العميل. هذي وظائف مدير المشروع، مدير المبيعات، مدير العمليات، وكل منصب فيه "إدارة أزمة".
3. وظائف تصنع المعنى والإحساس
تقدر تخلي AI يكتب لك قصة، يرسم لوحة، يألف لحن، يصمم شعار. والتقنية كل يوم تصير أذكى وأجمل. بس اسأل نفسك سؤال: ليش الناس تحضر حفل لمطرب وتدفع 500 ريال على التذكرة، مع إنها تقدر تسمع أغانيه بجودة عالية ببلاش على يوتيوب؟
لأنها ما تشتري الصوت. تشتري الإحساس. تشتري القصة. تشتري إنها تشوف بني آدم حقي واقف قدامها يتعرق ويغلط ويضحك. تشتري اللحظة اللي ما تتكرر. AI يعطيك مثالية وخطط عالية الجودة، لكن عمره ما بيعطيك معنى يهمك أنت شخصياً.
لذلك المدرس اللي يعرف يحمس الطلاب، المدرب اللي يغير حياة شخص بكلمة، الكاتب اللي تحس إنه يكتب لك أنت، المصمم اللي يفهم ذوقك من نظرة، كل هذول آمنين. لأنهم يبيعون جزء من إنسانيتهم، وهذا ما يقدر يبيعه كود.
4. وظائف التوقيع الأخير والمسؤولية
من راح ينسجن لو القرار كان كارثي؟ المبرمج اللي صنع الـ AI؟ ولا المدير اللي وقع على القرار وقال "توكلنا على الله"؟
أي شغلة فيها "أنا أتحمل العواقب" بتظل وظيفة بشرية لآخر يوم. القرارات المالية الكبيرة، قرار فصل موظف، قرار إطلاق منتج، قرار إيقاف مشروع خسر ملايين. محد يقدر يقول للقاضي "الكمبيوتر قال لي أسوي كذا".
لأن الآلة ما عندها سمعة تخاف عليها، ولا عائلة تعولها، ولا مستقبل تبنيه. المسؤولية ثقيلة، وما يشيلها إلا إنسان. لذلك الرئيس التنفيذي، صاحب العمل، المدير المسؤول، كلهم بيظلون بشر. AI بيكون مستشار ذكي، لكن التوقيع بيظل توقيعك أنت.
وش تسوي الحين عشان ما تنتهي؟
لا تدخل سباق مع الآلة في السرعة والدقة. هذا سباق خسران من قبل ما يبدأ. الآلة أسرع، أدق، ما تتعب، ما تطلب زيادة راتب. لو ركزت على هذي الأشياء، بتخسر.
العب في الملعب الثاني. الملعب اللي فيه العلاقات، الحكم على المواقف، التفاوض، فهم ما بين السطور، قراءة لغة الجسد، تحمل المسؤولية، بناء الثقة. هذي الأشياء ما تنتعلم من كورس أسبوعين، وتحتاج سنوات عشان تتقنها.
ابدأ من بكرا. امسك وظيفتك الحالية وافصلها لجزئين:
الجزء الأول: الأشياء المكررة اللي تقدر تعطيها لـ AI. تعلم تستخدمه فيها. خلّه يلخص لك، يكتب لك مسودة، يرتب لك البيانات. وفر 3 ساعات يومياً.
ومن الأمثلة العملية على استخدام الذكاء الاصطناعي كمساعد وليس كبديل، تصميم العروض التقديمية وتنسيقها مع بقاء المحتوى والفكرة من إعدادك أنت. تقدر تقرأ أكثر في مقال استخدام الذكاء الاصطناعي في العروض التقديمية.
الجزء الثاني: الأشياء اللي ما يقدر يسويها. اجتمع مع العميل، حل مشكلة الفريق، فاوض على العقد، اتخذ القرار الصعب، ابني علاقة مع المورد. خذ الساعات اللي وفرتها واشتغل عليها.
مع الوقت، الـAI بيصير مساعدك الشخصي اللي ينجز لك جزءاً كبيراً جدا من مهامك الروتينية، بينما تتفرغ أنت للأعمال التي تحقق أكبر قيمة وتأثير.
بعض الأمثلة لوظائف تطورت مع الذكاء الاصطناعي
شوف مصمم الجرافيك. قبل كان يضيع يوم كامل وهو يعدل مقاسات الصورة. الحين AI يسويها في دقيقة. المصمم الذكي ما قعد يبكي، تعلم يستخدم الأداة وصار يركز على الفكرة الإبداعية، على فهم العميل، على تقديم 3 خيارات مختلفة كل خيار له قصة. دخله زاد لأنه صار يبيع فكرة، مو وقت.
شوف المبرمج. AI صار يكتب له كود أساسي. المبرمج الشاطر ما خاف، صار يستخدمه عشان يخلص الجزء الممل ويتفرغ للهندسة المعمارية للبرنامج، للـ debugging المعقد، للتواصل مع العميل وفهم طلبه الحقي. صار يشتغل على مشروعين في نفس الوقت اللي كان يشتغل فيه على مشروع واحد.
حتى في التسويق، الكاتب اللي كان يكتب 10 مقالات روتينية في الأسبوع، الحين يخلي AI يكتب المسودة الأولى، وهو يراجعها ويضيف عليها القص والأمثلة واللمسة الشخصية. صار ينتج مقالين بس، لكن كل مقال يجيب نتائج أفضل من 10 مقالات قديمة.
الخلاصة اللي بتغير تفكيرك
الذكاء الاصطناعي مو نهاية الوظائف. هو نهاية الوظائف المملة. هو غربال بيصفّي الناس اللي تشتغل بيدها بس عن الناس اللي تشتغل بعقلها.
فبدل ما تسأل "متى بيستبدلني؟"، اسأل نفسك سؤال أهم: "وشو الشي اللي أسويه في شغلي وما يقدر يسويه روبوت أبداً؟". الجواب على هذا السؤال هو مستقبلك الوظيفي. اشتغل عليه، طوّره، استثمر فيه.
الآلة ما عندها طموح، ما عندها خوف، ما عندها حلم. أنت عندك. استخدم هذا الفرق لصالحك.
سؤال: وشو الجزء من شغلك اللي تحس إن AI ما يقدر يلمسه؟
تعليقات
إرسال تعليق
شكرا لمنحي جزء من وقتك الثمين