القيادة والترابط يصنعان الفريق...العدد لا يكفي

نجاح فريق العمل لا يعتمد على عدد الموظفين أو خبراتهم فقط، بل يعتمد على مستوى الترابط بينهم وقدرة القائد على بناء بيئة تجعل الجميع يعمل لتحقيق هدف واحد. في هذا المقال نستعرض كيف تبني فريقاً مترابطاً يحقق نتائج أعلى من مجموع أفراده.

ليش تجمع 10 موظفين وتطلع بنتيجة موظف واحد؟

أغلب المدراء يغلطون نفس الغلطة. يجمعون 10 موظفين، يسمونهم "فريق"، ويستغربون ليش الشغل متقطع والناس شغالة كل واحد في جهة. الحقيقة؟ جمع الناس سهل. الصعب إنك تخليهم يشتغلون كأنهم شخص واحد.

هنا يبان الفرق بين المدير التقليدي والقائد الحقيقي، لأن القيادة لا تعني إدارة الأشخاص فقط، بل بناء فريق مترابط يعمل لتحقيق هدف واحد.

المدير يجمع، والقائد يربط

أي مدير يقدر يوظف. يفتح الموقع، ينزل إعلان، يختار السير الذاتية، وبعد أسبوع عنده فريق. لكن بعد شهر تبدأ المشاكل. هذا يقول مالي دخل، وهذا يرمي الشغل على الثاني، وكل واحد شايل همه لحاله.

ليش؟ لأن ما فيه شيء يربطهم غير ورقة العقد. ما فيه هدف مشترك يحسون إنه حقهم. ما فيه تفاهم بينهم وما فيه قناعة انه الموظف الاول يكمل شغل الثاني.

القائد اللي فاهم هذي النقطة. هو ما يوقف عند "من أوظف". يسأل نفسه: إذا جبت هذولا الناس، كيف أخليهم يشتغلون مع بعض بدون ما أجلس فوق روسهم 24 ساعة؟

ولأن نجاح أي فريق لا يعتمد على الأشخاص فقط، بل على اختيار الشخص المناسب في المكان المناسب والوقت المناسب، يمكنك الاطلاع أيضاً على: في قيادة فريقك تأكد إنك تعتمد ثلاث أساسات لإتمام أي مهمة

المشكلة إن كثير مدراء يظنون إن الحل بالتحفيز أو بالتهديد. يعطي بونص، يهدد بالفصل، ويتوقع إن الناس بتصير فريق فجأة. لكن التحفيز الخارجي ما يبني ترابط. يبني التزام مؤقت، ويختفي أول ما يختفي السبب.

إذا ما فيه ترابط، بيصير عندك 10 موظفين ممتازين... ونتيجة غير مرضية. لانه في فرق كبير بين بناء فريق حقيقي و جمع موظفين لتشكيل فريق.

شكل الفريق لما يكون مفكك

تخيل فريق كورة، كل لاعب ماسك كورة ويركض فيها لحاله. الكل يتحرك، الكل متعب، لكن في الاخير نتائج سيئة, والنهاية الفريق بلا هوية وبلا أهداف. هذا بالضبط شكل فريق العمل اللي ما عنده رؤية مشتركة.

تجي الصباح تلقى إيميلات كثيرة، اجتماعات أكثر، وشغل يخلص بس ما يخدم الهدف. تسأل الموظفين: ليش تعبانين؟ يقولون ما ندري، بس ضغط. الضغط هذا سببه إنهم يشتغلون جنب بعض، مو مع بعض.

والأسوأ؟ تبدأ تلوم الأشخاص. تطرد واحد، توظف ثاني، وترجع نفس المشكلة. لأنك ما غيرت النظام، فقط غيرت الوجوه.

المصيبة إن الفريق المفكك يستهلك طاقتك كلها. تصير أنت حلقة الوصل بينهم. كل قرار صغير يجيك، كل مشكلة بسيطة لازم تحلها. بدل ما تبني ادارتك، تصير موظف توصيل بين الموظفين.

وكثير من المدراء يحاولون حل هذه المشكلة بالمراقبة المستمرة والتدخل في كل صغيرة وكبيرة، بينما قد يؤدي ذلك إلى نتائج عكسية داخل الفريق. اقرأ أيضاً: كيف تصبح قائدًا ناجحًا؟ ابتعد عن التدقيق المبالغ فيه

متى تعرف إن الفريق صار فريق فعلاً؟

لما يكون فيه 3 أشياء:

أولاً: كل واحد فاهم دوره زين. ما يحتاج تسأله كل يوم "وش شغلك؟". هو عارف، ومرتاح.

ثانيًا: الناس تساعد بعض من نفسها. يشوفون فلان مضغوط، تلقاهم يساعدونه بدون ما يطلب مساعدة. لأن نجاحه من نجاحهم.

ثالثًا: الكل يفهم إن نجاح الفريق أهم من الإنجازات الشخصية. ما عاد فيه "هذا شغلي ولا تدخل فيه".

إذا صار هالشي، بتقل الاجتماعات، بيقل التدخل منك، وبيزيد الإنتاج. لأن الشغل صار يمشي لحاله.

والنقطة الأهم؟ إنك تقدر تطلع إجازة أسبوع وترجع تلقى الشغل ماشي، ويمكن أحسن. لأن النظام شغال، مو شخصك اللي شغال.

الغلط اللي يطيح فيه أغلب المدراء

يجي المدير يقول: أبغى فريق قوي. طيب وش تسوي؟ يروح يدور بين الموظفين عن الأذكى، الأسرع، اللي عنده خبرة 10 سنين. يجمعهم، ويقول خلاص أنا سويت اللي علي.

بس هو ما سأل السؤال المهم: كيف أخلي هذولا يشتغلون مع بعض؟

مثال بسيط: كثير من الأندية الرياضية جمعت أفضل النجوم في العالم، لكن النتائج لم تكن دائماً بمستوى التوقعات. لأن وجود أفضل اللاعبين لا يعني بالضرورة وجود أفضل فريق. النجاح يحتاج ترابطاً بين الأدوار وتعاوناً بين الجميع، وهذا ينطبق على فرق العمل تماماً.

عشان كذا السؤال الصح دايم لكل قائد ناجح هو: وش النظام اللي لو حطيته، حتى الموظف المتوسط بيطلع شغله فوق المتوسط لأنه مستفيد من شغل غيره؟

ولأن الإدارة الناجحة لا تعتمد على القيادة فقط، بل على التخطيط والتنظيم والمتابعة أيضاً. اقرأ كذلك: التخطيط، التنظيم، القيادة، والسيطرة: دورة حياة الإدارة الناجحة

كيف تبني الترابط هذا عمليًا؟

عندك فريق وتبغاهم يشتغلون مع بعض؟ 

ما يحتاج كلام تحفيزي واجتماعات طويلة. يحتاج 4 أشياء بسيطة:

1. وضح الهدف باسهل صورة وتذكر انك تتحدث مع عقول مختلفة

مثلا لا تقول "نبي نكبر العمل". قل "نبي نوصل 1000 عميل راضي بنهاية السنة". رقم واضح، تاريخ واضح. إذا الهدف ضبابي، كل واحد بيفهمه على كيفه.

وكرر الهدف في كل اجتماع، في كل رسالة، في كل قرار. الناس تنسى بسرعة. تذكيرك المستمر يخلي الهدف يعيش في بالهم.

2. خلي نجاحهم مرتبط ببعض

مثلا في اي شركة, إذا التسويق ينجح لوحده، والمبيعات تنجح لوحدها، ليش بيساعدون بعض؟ لذا الحل هو ربط المكافأة بشيء جماعي يكون مقياس يخليهم يضطرون يشتغلون مع بعض, مثل تخليها مرتبطة بنسبة رضا العملاء, ما تكون على كمية العقود او نسبة مبيعات.

لما يكون مصيرهم واحد، بيصير اهتمامهم واحد. بيصير اللي في خدمة العملاء يهتم بالتسويق، واللي في التسويق يسأل عن المبيعات.

لكن بناء الأنظمة الجماعية يحتاج أيضاً التفكير في الآثار الجانبية لأي قرار أو مقياس أداء جديد حتى لا يتحول الحل إلى مشكلة أكبر. اقرأ أيضاً: احذر أن تضع حل لمشكلة، ويكون الحل مشكلة أكبر

3. افتح مجال للكلام الصريح

مرة بالأسبوع اجلس معهم 15 دقيقة واسأل: وش معطلكم؟ وين تعلقون؟ لا تخلون الاجتماع تقرير وإنجاز فقط. إذا الناس ما تتكلم، المشاكل تتكوم لين تنفجر.

والأهم إنك تسمع بدون دفاع. إذا الموظف حس إنك بتزعل من صراحته، بيسكت، وبتخسر فرصة تحل المشكلة بدري.

4. احتفل بالشغل الجماعي

إذا واحد أنجز، لا تمدحه لحاله. قل: "الفريق اشتغل زين، وهذا جزء منه". كذا الناس تحس إنها في مركب واحد.

ترى الاحتفال معنى مو تكاليف لذا الاحتفال ممكن يكون رسالة في القروب، او شكر سريع في الاجتماع، كلمة تقدير. الأشياء الصغيرة هذي تبني ثقافة "إحنا" بدل "أنا".

الفرق تشوفه بعينك

فريقك اذا كنت فقط مدير : نقاط منفصلة. كل واحد في زاوية. تسأله عن شغل الثاني يقول مالي دخل. التعب كثير، والنتيجة عادية.

فريقك اذا كنت قائد: نقاط متصلة. كل واحد عارف إنه لو طاح الثاني، بيطيح هو بعد. لذلك يساعده. الشغل أخف، والنتيجة أقوى.

نفس الأشخاص ممكن يكونون في الفريقين. الفرق مو فيهم، الفرق في النظام اللي حطيته لهم.

القيادة معناها الحقيقي

القيادة مو إنك توزع مهام. أي برنامج إدارة مهام يسويها. القيادة إنك تبني معاني. تخلي الموظف يحس إنه جزء من شيء أكبر من راتبه.

الناس تتحمل الضغط، وتسهر، وتتعب، إذا فهمت ليش تسوي كذا. لكن إذا كانت تشتغل عشان "المدير قال"، بتوقف أول ما يختفي المدير.

والقيادة الحقيقية تبان وقت الأزمة. الفريق المترابط ما ينهار أول ما يجي ضغط. بالعكس، يتقارب أكثر ويحل المشكلة مع بعض.

ومن الأمثلة الملهمة على توحيد الصفوف والعمل لتحقيق هدف مشترك ما تحدثنا عنه في:القيادة في تاريخنا الإسلامي: دروس نستفيد منها اليوم من موقف أبي بكر الصديق

لذلك قبل لا تسأل "من أوظف؟"، اسأل "كيف أخلي أي واحد يجي يشتغل مع الثاني بدون ما أتدخل؟".

الخلاصة بكلمتين

الفريق ما يُقاس بعدد الأشخاص. يُقاس بقوة العلاقة بينهم. والفريق نظام وليس مجموعة اشخاص.

القائد الشاطر ما يكتفي إنه يبني فريق. هو يبني جسر بينهم. جسر يخليهم يفهمون بعض، يساعدون بعض، ويربطهم لتحقيق هدف واحد.

إذا سويت هذا، ما عاد تحتاج تدقق، ولا تحتاج تراقب، ولا تحتاج تهدد. لأن الناس صارت تشتغل لأنها تبي، مو لأنها مضطرة.

وإذا ما سويت هذا، بيصير عندك دوام طويل، موظفين متعبين، ونتيجة أقل من العادي. حتى لو كلهم عباقرة.

الفرق بين الفريق العادي والفريق القوي؟ كلمة وحدة: الترابط.