العقلية الناضجة: لماذا النجاح الجماعي أفضل من المنافسة الفردية

العقلية الناضجة لا تخاف من الأشخاص الأكفأ منها. بل ترى فيهم إضافة ترفع مستوى الجميع.

هذه الجملة البسيطة تختصر فرقاً هائلاً بين عقلية تبني وعقلية تهدم. بين إنسان يوسع دائرته ليكبر معها، وإنسان يضيق دائرته خوفاً من أن يصغر هو.

في عالم اليوم، سواء في الشغل، الدراسة، أو حتى العلاقات، بنقابل نوعين من الناس. نوع أول يرتاح لما يشوف اللي حوله ناجحين، ويعتبر نجاحهم دعم له. ونوع ثاني يتوتر، يضيق صدره، ويبدأ رحلة إقصاء وتقليل وتشكيك.

المشكلة إنه في الغالب النوع الثاني يعتقد إنه يحمي نفسه، وهو في الحقيقة يدمر بيئته ويوقف نموه.

الخوف من الأكفأ: جذور المشكلة

خلنا نكون صريحين. الشعور بالتهديد لما تشوف شخص أذكى منك، أسرع منك، أو شاطر في مهارة أنت ضعيف فيها، شعور إنساني طبيعي يشعر فيه كثير من الناس. المشكلة ابدا مو في الشعور، المشكلة في التصرف اللي يجي بعده.

الشخص اللي عقليته لسه في مرحلة "الندرة" يظن إن النجاح كعكة حجمها ثابت. إذا أخذ منها اي شخص قطعة كبيرة، معناته ما بقي لي إلا الفتات. لذلك يبدأ يشتغل على إضعاف الآخرين بدل ما يشتغل على تطوير نفسه.

هذي العقلية تظهر في أشكال كثيرة. مدير يخفي المعلومات عن فريقه عشان يظل هو الوحيد اللي فاهم. موظف يشوه سمعة زميله الجديد عشان ما ياخذ مكانه. صاحب مشروع يسخر من فكرة منافسه بدل ما يطور فكرته.

السبب الجذري اللي يخليه يسوي كذا: الخوف، وفقط الخوف. خوف من المقارنة، خوف من الفقد، خوف من إنه ما يكون الأفضل. والمفارقة إنه بهذا التصرفات يثبت لنفس وللجميع إن فعلاً مو واثق في قيمته.

العقلية الناضجة تشوفها فرصة، مو تهديد

العقلية الناضجة تشتغل بعقلية "الوفرة" اي الغزارة، اي الفيض، يمعنى ان هناك الكثير جدا من هذا الشيء. هذه العقلية تؤمن إن النجاح يتوسع ويزداد نطاقه كلما كان هناك نجاح، وإن كل شخص ناجح حولك يرفع سقف التوقعات ويخلق فرص جديدة للكل.

لما تشتغل مع شخص أكفأ منك، عندك خيارين. الأول إنك تنسحب وتقول "ما أقدر أنافسه". الثاني إنك تقرب منه وتقول "علمّني". الخيار الثاني صعب على الأنا، لكنه الوحيد اللي يكبرك فعلياً.

تخيلها في كرة قدم. لو لاعب من الفريق خايف ان زميله يتوفق عليه لانه أسرع وأدق، وقرر يمنع عنه الكورة وما يمررها له, ويحاول يطلب الكوره لنفسه من باقي زملاءه باستمرار يحاول يمنعه من الظهور عشان هو ياخذ الاضواء، ايش بتكون النتيجة؟ الفريق كله غير منظم والاعتماد على انجاح لاعب واحد ويسهل على الخصم قراءة اللعبة وغالبا بالنهاية محد ينجح والفريق سيء. لكن لو شاف فيه فرصة وساعده، وهو بالمقابل بيساعد كذ الفريق يكون افضل واخطر وفرصة التسجيل اعلى، وبالمقابل شكل الفريق يكون افضل ويأخذ الفريق كل الصيت باللعب المنظم والجماعية، بالمقابل هو اسمه راح يلمع كجزء من فريق ناجح.

هذا هو الفرق. العقلية الناضجة تفهم إنك ما تحتاج تكون الأفضل في كل شيء. تحتاج تكون في مكان تتعلم فيه من الأفضل، وتضيف قيمتك في مكان ثاني.

لماذا النجاح الجماعي يهزم التفوق الفردي؟

لأن أي تفوق مبني على الغيرة والسيطرة يكون مؤقت بطبيعته. ويحتاج الى بذل طاقة هائلة في المراقبة، التتبع، الإقصاء. طاقة كان ممكن تستثمرها في بناء شيء حقيقي.

التاريخ والشركات والأفكار الكبيرة ما قامت على شخص واحد خارق، قامت على فرق.  ستيف جوبز مثلا ما بنى شركة أبل لحاله.كان معه فريق تصميم، هندسة، تسويق وغيره. والاكيد انه كل واحد فيهم كان أكفأ منه في مجاله، وهو عرف يجمعهم ويوجههم.

النجاح الجماعي له 3 مميزات ما يقدر يوفرها التفوق الفردي:

1. الاستمرارية:

الفرد يمرض، يتعب، يمل. ينما الفريق قابل للتجديد. بمعنى لو غاب شخص، يقوم غيره بتغطية مهامة. والنتيجة المشروع ما يوقف.

2. التنوع:

كل شخص يجيب زاوية مختلفة، مهارة مختلفة، طريقة تفكير مختلفة. النتيجة حلول أذكى وأشمل من أي عقل واحد.

3. المناعة:

الفريق اللي أفراده يدعمون بعض يصمد قدام الأزمات. بينما الفرد اللي بنى نجاحه على إسقاط الآخرين، أول ما يطيح ما يلقى أحد يسنده.

لذلك العقل الناضج يستوعب ويفهم بكل بساطة إنه لو انا رفعت اللي حولي، أنا اكيد برفع نفسي معهم. والعكس غير صحيح اطلاقا.

ولأن قوة النجاح الجماعي تعتمد على الترابط الحقيقي بين الأفراد وليس مجرد جمع الأشخاص في مكان واحد، يمكنك الاطلاع أيضاً على: القيادة والترابط يصنعان الفريق... العدد لا يكفي

علامات إنك لسه في عقلية المقارنة

أحياناً نكون في عقلية الإقصاء بدون ما ندري. هذي بعض العلامات:

- تحس بانزعاج داخلي لما مدحوا زميلك في الاجتماع، حتى لو أنت ما سويت شغل.

- تبدأ تبحث عن أخطاء الناس الناجحين عشان ترتاح نفسياً.

- تخفي معلومات عن فريقك "عشان محد يتفوق عليك".

- تحس إنه نجاح الاخرين راح يقلل من قيمتك.

لو لقيت فيك علامة أو اثنين، هذا مو نهاية العالم. الوعي بالمشكلة هو أول خطوة للحل. المشكلة تصير لما تنكر وتكمل بنفس الطريقة سنين وانت مو حاس انها مشكلة وحلها سهل، وبدون ما تحس انك قاعد تستنزف طاقتك ومجهودك بطريقة غلط.

كيف تبني عقلية ناضجة خطوة بخطوة؟

1. غيّر سؤالك الداخلي

بدل ما تسأل نفسك "كيف أتفوق عليه؟"، اسأل "وش أقدر أتعلمه منه؟". هذا التغيير البسيط يحول عقلك من وضع دفاعي لوضع تعلم.

المقارنة مع الآخرين بتخليك تعيس. لكن لو خليت المقارنة بين نفسك اليوم مع نفسك أمس بتشوف نتايج هذه المقارنة بسرعة وبتكتشف انها تبنيك.

2. احتفل بنجاح الآخرين علناً

صعبة على الأنا، واكيد انها صعبة على الأنا، وبما لك شك فيه انها صعبة على الأنا. لكن خذها تدريب لنفسك والأحتفال بنجاح الاخرين يعتبر بداية اعتراف لنفسك انه في احد تفوق عليك، وانت تحاول تتصالح مع الموضوع. وبالمره خذها بأيجابية اثناء صارعك مع نفسك بالاعتراف،في ايجابيات ممكن تاخذها. مثلا تأكد انك لما تمدح زميلك قدام المدير، أنت ابدا ما تقلل من نفسك. أنت تبني سمعة إنك قادر على ان تكون قائد فريق، مو موظف عادي. بالاضافة انك قاعد تدرب نفسك على شي اهم.

الناس تذكر اللي يرفعهم. ومع الوقت، بيلتفون حولك لأنك بيئة آمنة للنمو.

3. شارك معرفتك حتى لو كنت خايف

أكبر وهم هو إنك لو علمت الناس شغلك، بيستغنون عنك. الحقيقة إنك لما تعلم، تصبح أنت المرجع. تصبح الشخص اللي يفهم الصورة الكاملة.

المعرفة ما تنقص بالعطاء. كل ما علمت اكثر، بتفهم أكثر، وبتكتشف ثغرات عندك تحتاج تسدها.

4. اختار بيئتك بعناية

صعب تكون ناضج وأنت وسط بيئة كلها غيرة وتقليل. اختار ناس تشوف نجاحك مكسب لهم. اختار مدير يمدح فريقه، زملاء يساعدون بعض، بيئة فيها شفافية.

إذا قررت تقضي وقتك مع أشخاص لا تنسى انه وقتك غالي ومو كل الناس تستاهل وقتك. عشان كذا اختار الاشخاص الصح.

5. ركّز على قيمة أنت الوحيد اللي تقدمها

ما في شخصين متطابقين. عندك خلطة من مهارات، خبرات، شخصية، ما تتكرر. بدل ما تضيع وقتك في تقليد الأكفأ منك، اسأل: وش الشي اللي أنا مميز فيه؟ او هذا اللي صار الاكفأ وش ناقصة اصلا ممكن انا اقدر عليه؟

مثلا اذا هو شاطر بالشغل، خلك انت اشطر بالتواصل، وبتصير لسان الفريق والمتحدث عنهم. واذا هو اذكى منك وعنده حلول سريعة، خلك انت اسرع وحد يتفاعل مع الحل ويثبت انه ناجح.

لما تركز على قيمتك الفريدة، تختفي المقارنة. تصير لاعب في ملعبك الخاص.

مهمة القائد الناجح في سباق الأنا

الموظف اللي بعقلية غير ناضجة يشوف زميله الشاطر منافس. لكن القائد يشوفه ورقة رابحة.

القائد الناضج مهمته الأساسية إن يجمع ناس أكفأ منه، ويعطيهم مساحة، ويشيل عنهم العوائق. هو ما يحتاج يكون أذكى واحد في الغرفة. يحتاج يكون أفضل واحد في بناء الغرفة.

ولأن اختيار الأشخاص المناسبين وتوفير البيئة والتوقيت المناسب لهم جزء أساسي من نجاح أي فريق، اقرأ أيضاً: في قيادة فريقك تأكد إنك تعتمد ثلاث أساسات لإتمام أي مهمة

لو أنت مدير وتخاف من موظف أذكى منك، مباشرة بتسبب مشكلتين: الأولى على فريقك لأنك راح تكون عائق وبتوقف نمو الفريق، والثانية على نفسك لإنك أنت نفسك راح توقف لانك خايف من موظف يتخطاك. وبكل بساطة بتلقى أي فريق كنت تشوفه فريق عادي وغير منافس، صار ناجح اكثر من فريقك وبيتجاوزك.

أما لو رحبت بالكفاءة، بتبني فريق يقدر ينجز بدونك، وهذي علامة القيادة الحقيقية.

وبناء فرق قوية لا يعتمد على القيادة وحدها، بل يحتاج أيضاً إلى التخطيط والتنظيم والمتابعة المستمرة، كما وضحنا في: التخطيط، التنظيم، القيادة، والسيطرة: دورة حياة الإدارة الناجحة

ماذا عن الغيرة؟ ننكرها ولا نتعامل معها؟

الغيرة شعور طبيعي. إنكارها يخليها تتحكم فيك من تحت الطاولة. الاعتراف بها يخليك تتحكم فيها.

لما تحس بالغيرة، اسأل نفسك سؤالين: وش الشي اللي أغار منه بالضبط؟ وهل هذا الشي أقدر أوصله لو اشتغلت عليه؟

غالباً بتكتشف إن الغيرة إشارة. إشارة إن فيه شيء تبيه وما بديت تشتغل عليه. حوّل الإشارة هذي الى خطة. بدل ما تضيع طاقتك في التقليل من الشخص، ضيعها في تطوير نفسك.

الغيرة اللي ما تتحول لفعل، تتحول لسم. سم يقتلك من الداخل قبل ما يأذي غيرك.

البيئة الناضجة تربح الجميع

فكر معي لحظة وتخيل أي مكان عمل ناجح. غالباً يكون بيئة فيها احترام، مشاركة معرفة، ومدير ما يخاف من فريقه. النتيجة؟ الكل يبدع، الكل يتعلم، النتائج ترتفع، والناس تحب تجي الشغل.

والعكس صحيح. البيئة اللي فيها منافسات ومحاسبات، ومستوى الغيره والتقليل من نجاحات الزملاء، بتلقى الكل يشتغل بأقل مجهود. يخبي معلومة، يأخر تسليم، يحمي نفسه. النتيجة؟ استقالات، أخطاء، انجاز اقل.

أنت موظف معناه انت جزء من بيئة عمل. لذا سلوك راح يكون سبب يحدد نوع المكان اللي بتشتغل فيه.

لانه لو كل واحد قرر يرفع مستوى زميلة بدل ما ينزله، مع الوقت راح تكتشف إن مستوى الفريق كله صار أعلى، ولكل وصل مرحلة افضل من أي مرحلة كان شخص واحد يحاول يتفوق ويوصلها لحاله.

كيف تقدر تدرب نفسك على الابتعاد عن المنافسة والتركيز على العمل الجماعي

خطوات سهلة جدا لو طبقتها مع الوقت بتلاحظ انك تغيرت وغيرت للأفضل. خذها خطوة خطوة بكل بساطة:

1. اختار شخص في محيطك تشوفه أكفأ منك في نقطة معينة.

2. اطلب منه 15 دقيقة تسأله فيها سؤال واحد: "كيف تسوي اي شغلة انت ما تعرفها؟".

3. طبّق اللي علمك، وارجع اشكره.

4. كرر الخطوات بشكل مستمر، في كل مره تلقى احد يتقن شغلة احسن منك او ما تعرفها.

هذه الحركة البسيطة تكسر حاجز الخوف، تبني علاقة، وتدخلك في دائرة التعلم بدل دائرة المقارنة.

استمر فيها وحاول تحفز اي احد حولك ما يعرف شغلة انه يروح يسأل احد ثاني وبين انه عادي وطبيعي لأننا فريق، وبعد 3 شهور بتكتشف إنك تغيرت وقدرت تأثر على اللي حولك وغيرتهم. مو لأنكم صرتو تعرفون كل شيء، لكن لأنك صرت مرتاح مع فكرة إنك ما تعرف كل شيء، واثرت على اللي معك انه شي عادي اذا صرت ما تعرف وغيرك احسن منك.

الخلاصة: اختار سباقك صح

عندك خيارين في الحياة. الأول إنك تدخل سباق مع كل شخص حولك، وتحاول تثبت إنك أفضل منه. هذا سباق ما ينتهي، ولو فزت فيه بتكتشف إنك وحيد.

الخيار الثاني إنك تدخل سباق مع نفسك، ومع فريقك، ضد مشكلة مشتركة. هنا الفوز يعني إن الكل فاز.

العقلية الناضجة ما تخاف من الأكفأ. لأنها فاهمة إن قوة الواحد محدودة، وقوة الفريق ما لها حدود.

لذلك لا تنشغل بإقصاء الآخرين أو التقليل منهم. العقلية الناضجه الحقيقيه تفهم إن النجاح الجماعي أقوى من أي تفوق مؤقت مبني على الغيرة والسيطرة.

مرّت عليك مواقف حسيت فيها إنك لازم تختار بين رفع نفسك أو رفع الفريق؟ كيف تعاملت معها؟