الهيبة أم التخويف؟ لماذا يفشل القائد الذي يقود فريقه بالتخويف؟

الهيبة أم التخويف؟ الاحترام يبني الفريق والخوف يهدمه

تدخل الاجتماع، وجهك مكشر. صوتك عالي. جملة وحدة: "لو المشروع ما خلص بكرة، الكل راح يتحاسب. انا ما امزح".

الفريق يطلع مرعوب. يشتغل 12 ساعة. ينجز. الشغل يمشي.

بس اسأل نفسك سؤال واحد: انت قائد؟ ولا تستخدم اسلوب التخويف لتعويض غياب القيادة الحقيقية؟

فيه نوع قادة يعتمد على "مسرحية العقاب". يهدد، يصرخ، يلوح بالفصل، بالخصم، بالتحقيق... بس عمره ما نفذ شي. سلاحه الوحيد: الخوف.

كيف يشتغل أسلوب "التهديد بدون تنفيذ"؟

المعادلة بسيطة ونفسية 100%:

تهديد + صراخ + وجه غاضب = أدرينالين عالي عند الموظف = يشتغل بسرعة عشان ينجو

النتيجة الفورية: إنتاجية ترتفع أسبوع، شهر بالكثير. المدير ينبسط يقول "شفتو؟ الشدة زينة".

بس هذي مو إنتاجية. هذي هروب من العقاب.

واذا كان اعتماد اسلوب التخويف طريقة قياده لا ننسى ان مزاج القائد اليومي راح يأثر على ادارته للفريق، لان اسلوب التخويف يعتمد على التهديد والنبرات الحاده دايم، طيب اذا كان القائد في يوم فعلا معصب ومزاجه مو كويس ايش بيصير؟

وسبق تكلمنا عن كيف ان مزاج المدير وطريقة تعامله اليومية ممكن تاثر بطريقة مباشرة على أداء الفريق وثقته في مقال: كيف يؤثر مزاج المدير على إنتاجية الفريق؟ دليل الوضوح في بيئة العمل

خمس كوارث تصير بعد ما تستخدم التخويف

اللي يلمع أوله، يحترق آخره. هذي فاتورة الخوف:

الكارثة 1: الفريق يشتغل عشانك، مو عشان الشغل

أول ما تطلع إجازة أسبوع؟ كل شي يطيح. لأن الدافع الوحيد كان "المدير يراقب". بنيت فريق منجز معتمد على خوفك، مو على نظامك.

الكارثة 2: الموظفين الأذكياء يهربون أول ناس

الموظف الشاطر عنده خيارات. أول ما يحس انه المكان عبارة عن "سجن"، يقدم استقالته. ومع الوقت بتخسر الكفاءات، وراح يصير الفريق أقل تنوع في الخبرات والقدرات.

الكارثة 3: الكذب يصير العملة الرسمية

الموظف يخاف يقول "ما خلصت". فيكذب: "خلص 90%". تتأجل المشاكل لين تنفجر بوجهك. التخويف ما يلغي المشكلة، يخبّيها.

وإذا استمر الخوف عند الموظفين راح يصير التهرب والكذب وإخفاء الأخطاء من التصرفات اليومية الطبيعية للموظفين، ومع الوقت ممكن تتحول بيئة العمل بالكامل إلى بيئة سامة، مثل ما شرحنا في اسباب تحول بيئة العمل لبيئة سامة في مقال: بيئة العمل السامة: 7 علامات تقتل فريقك وخطة إنقاذ 30 يوم

الكارثة 4: الإبداع يموت

محد بيجرب فكرة جديدة وهو خايف. الكل بيقول "خلني على الآمن". منشأتك بتصير آلة نسخ، مو آلة ابتكار.

الكارثة 5: يوم بينكشف انك "تمثل"

الموظفين مو أغبياء. بعد شهرين بيفهمون انك تهدد بس ما تعاقب. وقتها بتخسر الاثنين: لا احترام، ولا خوف. بتصير "المدير اللي صوته عالي بس".

نتائج القيادة بالتخويف على الفريق

الفرق بين "الهيبة" و "التخويف" في ثلاث مقارنات مختصرة

القائد ذو الهيبة	قائد التخويف
يحترمونه لأنه عادل وحازم	يخافونه لأنه يصرخ ويهدد
لو قال كلمة، ينفذها بهدوء	يهدد 10 مرات وما يسوي شي
الفريق يشتغل وهو غايب	الفريق يوقف شغل وهو غايب

(الهيبة = احترام + ثقة) بالمقابل (التخويف = رعب + نفاق)

الفرق بين الهيبة والتخويف في القيادة

ثلاث اسباب تجعل بعض القادة يتوجهون لإسلوب التخويف

1. الكسل القيادي: بناء نظام وتفويض وثقافة ياخذ وقت. الصراخ أسهل بـ 10 ثواني.

2. انعدام الثقة بالنفس: "لو ما خوفتهم بيعرفون اني ما افهم". فيغطي ضعفه بالصوت العالي.

3. شافه من مديره القديم: "هذا اللي تعلمته". يظن ان القيادة = عسكر.

كلها أعذار. القائد الحقيقي يتحمل مسؤولية ويتعلم غيرها.

كيف تبني "هيبة" بدون ما تتحول لممثل رعب؟

خطة بسيطة من ثلاث خطوات راح اشرحها بأبسط صورة:

الخطوة 1: قلل الكلام، نفذ القرار

الموظف ما يحترم كثرة التهديدات؛ يحترم القائد اللي يقول شي ويسويه ويلتزم فيه.

قاعدة مهمه: إذا قلت "هذي آخر فرصة" لازم تكون اخر فرصه فعليا. يعني لازم تتبعها بإجراء واضح وعادل إذا تكرر الخطأ، وتنفذ بكل هدوء ومن غير استعراض أو صراخ .

الموظف بيقول: "هذا مدير كلمته سيف". وهذي الهيبة.

الخطوة 2: استبدل "العقاب" بـ "المسؤولية"

بدل ما تقول "اذا ما خلصت راح احاسبك على التقصير" قول: "أنت مسؤول عن نتيجة هالمشروع، وإذا واجهك اي عائق تعال لي من بدري عشان نحله مع بعض".

فرق كبير. الأول: انا ضدك. الثاني: احنا بنفس الخندق، وانت مسؤول.

الخطوة 3: امدح قدام الكل، عاتب بينك وبينه

قائد التخويف يسوي العكس: يمدح بالمكتب، ويصرخ ويسرط الاخطاء والتقصير قدام الكل.

القائد صاحب الهيبة: المدح بمكبر صوت، والملاحظة بهمس. لما الفريق يشوفك تحمي كرامة زميلك، بيحترمونك انت بعد.

قصة واقعية: كيف خسر خالد فريقه خلال 4 شهور؟

خالد استلم قسم جديد. أول اجتماع قال: "اللي يغلط بيمشي. انا ما عندي مجاملات".

الشهر الأول: معجزات. الفريق يشتغل للساعة 9. التسليم قبل الموعد.

الشهر الثاني: استقال أفضل 3 موظفين. والسبب "ما قدرو يشتغلون تحت التخويف المستمر من انهم ممكن يتحاسبون على اي زلة مهما كانو منتجين".

الشهر الثالث: بدأ التأخير. الكذب. التهرب. لان خالد انكشف انه فقط يهدد بدون فعل.

الشهر الرابع: خالد صار يصرخ أكثر لأن الكفاءة قلت والانتاجية اهتزت والشغل طاح. بالمقابل مهما صرخ ماعاد احد يخاف منه زي قبل. لأنهم يعرفون انه "بس كلام ".

بالاخير، خالد اضطر انه يستقيل ويمشي. بعد ما قال له مديره: " انت فكرت كيف تكون رئيس قسم منتج بسرعة وقدرت تكون منتج لمدة شهر بس، لكنك ما فكرت بعد الشهر ايش ممكن يصير".

ثلاث جمل بديلة عن "بحاسبك" تبني احترام فوراً

احفظها واستخدمها:

1. "انا أثق انك قدها. واذا واجهتك مشكلة، بابي مفتوح قبل لا تصير كارثة" تخلي الموظف يجيك بدري، مو يخبي المشكلة لين تكبر.

2. "النتيجة مسؤوليتك. الطريقة مسؤوليتك. انا هنا عشان أشيل العوائق عنك" تحولك من جلاد لقائد داعم.

3. "اذا تكرر نفس الغلط 3 مرات، معناها فيه شي بالنظام غلط. تعال نحله سوا" هنا تنقل اللوم من "انت فاشل" لـ "خلونا نصلح النظام".

الخلاصة: الخوف يحقق نتائج سريعة، لكن الاحترام يبني فريق مستمر بنفس الاداء

تقدر تخوف فريق كامل بكلمة. بس ما تقدر تخليه يحب الشغل بكلمة.

قائد التخويف ينجز مشروع. قائد الهيبة يبني ثقه تصنع له فريق يقدر ينجز حتى اذا ما كان موجود.

فاسأل نفسك كل ما رفعت صوتك: "انا الحين أبني هيبة؟ ولا أمثل فلم رعب بينكشف وينتهي؟"

لأن الفريق ما ينسى. اليوم يخاف منك. بكرة يكرهك. بعد شهر يتركك.

والقائد اللي الكل يخاف منه، هو أول واحد بيكون لحاله لما السفينة تغرق.