​احذر أن تضع حل لمشكلة، ويكون الحل مشكلة أكبر

كثير من القرارات الإدارية تفشل مو لأنها خاطئة من الأساس، لكن لأنها عالجت اللي يبان على السطح وتجاهلت اللي تحت. المدير المستعجل يبغى نتيجة اليوم، فيصدر أمر سريع يرضي التقرير الشهري، وبعد شهر يكتشف إنه خلق مشكلة أعقد من الأولى. هذي ظاهرة قديمة لها جذور في علم النفس الإداري، وأشهر مثال تاريخي لها صار في دلهي أيام الاحتلال البريطاني.

اخطر حل لأي مشكلة، هو الحل اللي يجيب لك مشكلة أكبر…

في الهند وفي دلهي تحديدا أيام الاحتلال، انتشرت افعى الكوبرا انتشار كبير جدا. الحكومة من الخوف قررت تحل هالازمه باسهل واسرع طريقه، والحل الذكي كان "مكافأة لكل شخص يجيب أفعى ميتة". واللي صار وقتها صارو الناس يربون الأفاعي عشان يكسبون فلوس. والمصيبه لما اكتشفت الحكومه قررت مباشره انها تلغي المكافأة، الكارثه قامو الناس فكّوا الأفاعي كلها بالشوارع. قرارين كانت المفروض انها حلول لكن كل حل جاب مصيبه اكبر.

هذا الحدث مشابه وقريب من اللي يسويه أغلب المدراء اليوم ، وهم يعتقدون انهم اصحاب قرارات سريعه وفعاله.

كيف يمكن حل مشكلة؟

احيان تعتقد ان قرارك حل سريع وفعال، لكن الواقع قرارك جاب لك 'مصيبه'

المصيبة تبدأ لما تشوف عرض المشكلة وتتحمس تحلها فوراً بدون ما تفكر خطوتين قدام.

مثلا قلت للفريق: "أبغى 50 مكالمة باليوم". النتيجة؟ صاروا يتصلون ويقفلون. جبت الرقم، وخسرت العملاء.

او قلت لهم: "أبغى 10 تقارير بالأسبوع". النتيجة؟ صار عندك مكتبة تقارير ما أحد يفتحها.

او قلت لموظفينك: "خصم على اللي يتأخر دقيقة". النتيجة؟ يجون بدري لكن يقضونها سواليف. حضور بدون إنتاجية.

أنت ما عالجت المرض. أنت كافأت الفيروس.

موظفينك دايم يعرفون يلعبون اللعبة أحسن منك

لا تلعب لعبة الأرقام مع فريقك لانهم بيهزمونك. أي نظام تحطه، بتلقى جزء من افراد فريقك بيلقون أسهل طريقة لتحقيق الرقم المطلوب بأقل جهد ممكن.

لو تقيس الكمية، بيقتلون الجودة.

لو تقيس السرعة، بيذبحون الدقة.

لو تقيس الشكل، بيعدمون المضمون.

المشكلة مو فيهم. المشكلة فيك لأنك صممت لعبه الغش فيها أسهل من الشغل الصح.

قبل لا تقرر، اسأل نفسك عن ثلاث أشياء

القائد الفاهم ما يطير بالعجة. يوقف لحظة ويتخيل إنه الموظف اللي بيحاول يغش النظام.

لو أنا الموظف، كيف أقدر أغش هذا النظام بسهولة؟

لو لقيتها بدقيقة، تأكد ان موظفينك لاقينها من أول يوم.

هل أنا أقيس الشي المهم فعلاً، ولا بس اقيس ارقام على ورق؟

"رضا العميل" هو الشي المهم. "عدد الإيميلات" رقم على ورق.

لو وقفت هذا القرار بكرة، هل بتطلع لي مشكلة أكبر كنت أنا السبب فيها؟

هل فيه "كوبرا" أنت تربيها الحين؟

لا تعالج الحرارة، عالج الالتهاب

هذي قاعده طبيه واذا بنطبقها على قصة الكوبرا في دلهي معناه: الكوبرا اللي في الشارع كانت حرارة. الالتهاب كان "الناس تبي مصدر دخل سهل"

اذا بناخذ هذا المقياس في مجال العمل بنقدر نعطي امثله كثير منها:

• الفريق ما يخلص المهام بوقتها هذي حرارة. الالتهاب يمكن "الاجتماعات تاكل يومهم أو الأولويات تتغير كل يوم".

• العملاء زعلانين هذي حرارة. الالتهاب يمكن "وعودك أكبر من فعلك".

• استقالات مفاجئة هذي حرارة. الالتهاب يمكن "المدير المباشر سام".

إذا أنت فقط تبي تحط كمادات عشان الحرارة وما تدري عن الالتهاب، المريض يمكن يموت وأنت تصفق لنفسك إذا نزلت الحرارة شوي.

الحرارة هي اللي تشوفها على السطح وتزعجك. بينما الالتهاب هو السبب اللي لو ما عالجته بترجع الحرارة أقوى.

الخلاصه:

أخطر مدير هو اللي يحل المشاكل بسرعة وغباء.

لا تفرح بالحل السريع. الحل السريع غالباً هو بذرة الكارثة الجاية.

فكر في الأثر الثاني والثالث. فكر زي اللي بيحتال على نظامك. عالج المرض، مو العرض.

لأنك لو ربيت كوبرا في بيئتك، راح تلدغك أنت أول واحد.

ليش نقع في نفس الفخ الإداري؟

السبب نفسي قبل ما يكون إداري. عقل المدير يحب الإغلاق السريع. يشوف مشكلة، يحس بضغط، فيبغى يطفي النار بأي طريقة عشان يرجع يرتاح. هذا اسمه "تحيز الفعل". المشكلة إنك لما تتحرك بسرعة بدون فهم النظام، النظام يرد عليك بسلوك غير متوقع.

وكثير من القرارات المتسرعة تصدر بسبب شعور المدير بأنه يجب أن يكون منشغلاً بحل كل مشكلة فور ظهورها، بينما التركيز على الأولويات أهم من الانشغال المستمر. اقرأ أيضاً: "أنا مشغول" كذبة.. أنت مو مشغول، أنت فقط اخترت الانشغال بالأشياء الخطأ

في قصة الكوبرا، الحكومة شافت عدد الأفاعي وقللت المشكلة فيها. ما سألت: ليش الناس ما يقتلونها من نفسهم؟ وش يحفزهم؟ لما حطت مكافأة، غيّرت الحافز. صار الربح من تربية الأفعى أعلى من الخوف منها. وهذا بالضبط اللي يصير لما تربط مكافأة الموظف بعدد المكالمات. أنت ما خلقت بائع شاطر، أنت خلقت شخص يتصل ويقفل.

كيف تبني نظام ما ينغش بسهولة؟

الحل مو إنك تلغي الأهداف، الحل إنك تربط الهدف بالنتيجة النهائية اللي تهم العميل والشركة. لو تبغى مبيعات، قس رضا العميل بعد شهر من الشراء. لو تبغى سرعة، قس جودة الحل ونسبة الأخطاء. لو تبغى التزام، قس الإنتاجية الفعلية مو الحضور.

الأنظمة الذكية فيها ثلاث صفات: شفافة، يصعب التلاعب فيها، وتقيس النتيجة مو النشاط. قبل ما تعلن أي نظام جديد، اجمع 3 موظفين من الفريق واسألهم: "لو تبغون تخربون هذا النظام، كيف بتسوونها؟" لو ضحكوا وقالوا "سهلة"، فأنت لسه ما جهزت.

الفرق بين المدير والقائد هنا

المدير يحل المشكلة اللي قدامه. القائد يحل المشكلة اللي بتجي بعد 3 شهور بسبب الحل الأول. الفرق هذا يبان في الاجتماعات. المدير يقول: "خلصونا من الشكوى". القائد يقول: "ليش صارت الشكوى أصلاً؟ وش بتتغير لو حليناها كذا؟" القائد يفكر مع الفريق ,ولاجل الفريق ,وبطريقة عمل, واستيعاب الفريق.

ومن الأخطاء المرتبطة باتخاذ القرارات السريعة أيضًا التركيز المبالغ فيه على التفاصيل الصغيرة، لأن بعض المدراء يعتقدون أن التشدد والتدقيق المستمر هو الطريق للنجاح، بينما قد يؤدي ذلك إلى نتائج عكسية داخل الفريق. اقرأ أيضاً: كيف تصبح قائدًا ناجحًا؟ ابتعد عن التدقيق المبالغ فيه

التفكير بهذي الطريقة يحتاج صبر. يحتاج إنك تتحمل الضغط أسبوع زيادة عشان ما تدفع ثمن غالي بعدين. لكنه هو اللي يبني سمعتك وثقتك ويجعلك قائد، وهو اللي يخلي فريقك يحترمك لأنك ما تتصرف بعشوائية.

والقيادة الحكيمة لا تعتمد على سرعة القرار فقط، بل على فهم عواقبه ونتائجه على المدى البعيد. ومن الأمثلة الملهمة في تاريخنا الإسلامي: القيادة في تاريخنا الإسلامي: دروس نستفيد منها اليوم من موقف أبي بكر الصديق

خلاصة عملية تقدر تطبقها بكرة

أي قرار جديد، مرّره على هذي القائمة السريعة:

1. وش السلوك السيء اللي ممكن يكافئه هذا القرار بدون قصد؟
2. هل أنا أقيس النتيجة اللي تهم العميل، ولا أقيس حركة الموظف؟
3. لو ألغيت القرار بعد شهر، وش المشكلة الجديدة اللي بتواجهني؟
4. هل فيه طريقة أبسط وأبطأ لكن أأمن على المدى الطويل؟

تذكر: الإدارة مو سباق. الإدارة إنك توصل للنتيجة بدون ما تكسر النظام اللي شغال عليه.