جيل Z بالشغل: كيف تقود الموظفين الشباب بدون اي صدامات؟
بعض الاحيان قد لا تكون المشكله في الموظف الشاب، بل في البيئه التي لا تسمعه ولا تستفيد من طريقته المختلفه في التفكير.
لو قريت العنوان وما فهمت لا تستغرب، لانك مو لحالك اللي ما تعرف ايش القصد. كثير مدراء وقادة ما راح يفهمونها زيك.
لكن بوضح لك الفكره اول قبل اعلمك ايش معنى الجمله.
في ثقافه حديثه او نسميها اسلوب لتحديد فئات من المجمتع او طريقة تقسيم لمجموعات، المهم ان الشي هذا بكل بساطه قسم و حدد الاجيال العمريه برمز معين مثل Z ،Y ،X.
وطبعا من هذا التحديد احنا راح نتكلم عن فئة منهم اللي هي جيل Z.
ملاحظه: مهم نفهم من اللي قلنا انه جيل Z كان يسبقه جيل Y، وطبعا جيل Y يسبقه جيل X وهكذا.
التساؤل لدى الاغلب الآن: من هم جيل Z؟ وكيف نقدر نميزهم؟
جيلZ بكل بساطة:
هم الاشخاص اللي تاريخ ميلادهم تقريبا بالفترة ما بين نهاية التسعينيات الى اوائل العقد الثاني من الالفيه الثالثه، يعني بالارقام تستخدم التسميه هذي او التصنيف هذا لكل شخص تاريخ ميلاده داخل نطاق 1997–2012.
وبما اننا في عام 2026 معناه ان الجزء الاكبر من الموظفين الجدد حاليا من هذا الجيل، ونقدر نقول انهم الان في بدايات حياتهم المهنيه.
يعني الموظف اللي عمره 22، 23، 24 واللي توه متخرج وجاي عندك عشان مقابلة وظيفيه كلهم جيل Z.
وش يفرقون عن اللي سبقوهم؟
هم كبروا والهواتف الذكيه والإنترنت والسوشيال ميديا جزء طبيعي من حياتهم، بالمقابل الاجيال اللي قبلهم عاشت فترة الانتقال إلى التكنولجيا.
يعني بكل بساطه لو بنقارن طريقة اللعب الجماعي على سبيل المثال، بنلقى ان هذولي جيل يلعبون العاب الاكترونيه مع بعض وكل واحد فبيتهم بكل بساطه، بينما الاجيال اللي قبلهم لازم يجتمعون عشان يلعبون مع بعض.
طبيبعي بتكون طريقة تفكيركم مختلفه تماما.
ومن طريقة التفكير تبدا مشكلة هذا الجيل بالعمل...
جيل Z بالعمل: مواقف غالبا جربتها
تطلب منه شغله الساعه 9 الصباح. يرد عليك الساعه 12 الظهر يقولك لك "تمام" بدون اي اضافات او طلب توضيح. ويسلمها لك الساعه 4 العصر وفيها ثلاث اضافات انت ما طلبتها أصلا.
تقول له: "ليش تأخرت؟". يرد بكل برود: "كنت ادور على طريقه افضل عشان ما اسوي شي غلط".
انت: مستغرب ومتعجب ومصدوم. هو: طبيعي جدا.
هذا هو جيل Z. ماهو كسول. ولا هو مدلل. هو فقط يفكر بطريقه مختلفه عشان كذا تكون تصرفاته مختلفه، ممكن انت تشوفها غير مقبوله ولا يسويها موظف. المشكله انه يتوقع منك انك تستوعب تصرفاته بكل بساطه، وابدا لا تستغرب منه اذا استقال من عندك لانك ما قدرت تستوعب تصرفاته.
ليش المدراء والقاده غالبا يشوفون جيل Z غريبين؟ الفرق الجذري
جيل X وجيل الالفية(Millennials): غالبا موظف يشتغل عشان يعيش. موظف يحترم التسلسل الاداري.
جيل Z: اغلبهم موظفين يعطون وزن اكبر للمعنى، والتطور، والتوازن بين العمل والحياه، بجانب الراتب والاستقرار.
انت تقول: "اشتغل 8 ساعات بالمكتب".
هو يسمع: "ضيع 8 ساعات من حياتك بمكان تكرهه".
المشكلة مو فيه. المشكله انك تشرح له بلغة 2010 وهو عايش بـ 2026.
خمس قواعد ذهبيه لقيادة جيل Z بدون ما يطفش
القاعده 1: لا تقول له "وش تسوي" قول له "ليش نسويها"
جيل Z يتفاعلون بشكل أفضل اذا فهمو سبب المهمه وتاثيرها.
بدل "سوي التقرير هذا". قول: "التقرير هذا بيخلي العميل يقرر بـ 10 مليون. لو فشلنا بيروح. تقدر تشيله؟" عطيته معنى + ثقه. راح بيبدع لك.
القاعده 2: التغذيه الراجعه يوميه، مو سنويه
انت متعود تقيم الموظف كل سنة. بس هو ينتظر منك feedback على كل شي يسويه.
التقييم السنوي بالنسبه لها لوقته في تقييم لكل شي. جيل Z يحتاج يعرف بشكل مستمر: وش سوا صح؟ وش يحتاج يحسن؟
خل التغذيه الراجعة قصيره ومتكرره هو ما صعب عليه ينتظر الى نهايه السنة.
القاعده 3: مرونه بالوقت، حزم بالنتيجه
تقول له دوام 8-5 بالمكتب؟ كأنك تقول له "انت بالثانوي".
جرب عطه مرونه في الوقت او المكان، بالذات إذا طبيعة العمل تسمح، لكن خلك واضح جدا في النتيجه والموعد والمسؤوليه. بيعطيك نتيجه اسرع من اللي يداوم 8 ساعات.
جيل Z يبيعك النتيجه، مو وقت.
القاعده 4: لا تعطيه مهمه، عطه تحدي
كثير من الموظفين بدون تحديد العمر يتفاعلون اكثر اذا عرضت عليهم المشكله على انها تحد يحتاج حل، بدل مجرد خطوات روتينيه للتنفيذ. وجيل Z مبدعين بالنقطه هذي اكثر واكثر.
مثلا بدل جملة "دخل البيانات هذي كلها". قول: "عندنا 1000 صف من البيانات ونحتاج ندخلها خلال يومين، تقدر تخلي ادخالها اتوماتيك بالذكاء الاصطناعي ونخلص قبل يومين؟"
حولت الشغل الممل الى لعبه ذكاء وتحدي وهو يحب الألعاب.
القاعده 5: اسمعه، حتى لو كلامه غريب
ممكن بيجيك باقتراح غريب مره وغير مألوف. لا ترفض ابدا بكل بساطه.
اسأله "كيف تتوقع نقدر نسويها؟". يمكن تكون الفكره قابله للتطبيق بس يبيلها تعديل و توفر عليك 5 ساعات اجتماعات.
اسمع لان الاغلب بيعطيك فكره تختصر شي. جيل Z يعشقون الاختصار.
وتاكد ان فكرة البحث عن الاختصارات وايجاد طريقه اذكى واسرع للانجاز ما تعني الكسل دايم، قد تكلمنا عن هالنوع من التفكير في مقال: الموظف الذكي الكسول: ليش ممكن يكون أهم موظف في فريقك؟
أفكار الموظفين الشباب قد تبدو مختلفه في البدايه، لكن الاستماع لها قد يكشف فرص حقيقيه لتحسين العمل.
ثلاث أخطاء تقتل جيل Z وتخليه يستقيل
الخطأ 1: "احنا على أيامنا..."
كل ما تقول هالجملة حتى لو بعدها كلامك بيكون اثبات ان الوقت تغير، لانه راح يسمعها "انت قديم وما تفهم". لا تقارن.
قول "جربنا هالطريقه وفشلت عشان كذا، وش رايك نجرب طريقتك؟"
لان اساسا انك تقرر تسمع لراي اي موظف وان تشركه في الحل مهم جدا للاقناع بالذات اذا راح تطبق تغيير جديد، لان فرض الفكره بطريقه تقليديه ممكن يزيد المقاوم، زي ما شرحنا في مقال: فن الإقناع للقادة: كيف تقنع فريقك وتتجاوز مقاومة التغيير؟
الخطأ 2: الاجتماعات الطويله
الاجتماعات الطويله بدون هدف واضح بالغالب تضيع تركيز اي فريق، واللي متعود على انه ياخذ معلومات سريعه بتكون بالنسبة له متعبه جدا. وجيل Z من هذا النوع عشان كذا ماراح يرتاح ولا يتقبل نوعيه الاجتماعات هذي.
مع جيل Z، اذا كانت النقطه تخلص في 15 دقيقة، ابدا لا تخلي الاجتماع ساعه مهما كان السبب.
الخطأ 3: تمنعه يستخدم السوشيال ميديا بشكل عام
لا تحاول تمنعه لكن دور حل منطقي يحد من استخدامه او يخلي الاستخدام داخل اطار معين. مثل انك حدد سياسات واضحه لاستخدام السوشيال ميديا بوقت الدوام.
حدد بكل وضوح ايش الاشياء الممنوع نشرها نهائيا مثل "معلومات العملاء، البيانات السريه، صور بيئة العمل الحساسه، وأي محتوى يخالف سياسات المنشأة" واتركه يصور الباقي براحته.
هو يشوف الشغل جزء من حياته. اذا منعته، بيحس انك تخنقه.
قصه واقعيه: عبدالله اللي نقله مديره لقسم ثاني عشان يصعبها عليه ... لكنه أثبت نفسه
عبدالله عمره 21 سنة. بدأ في قسم خدمات العملاء المميزين، لكن أسلوبه ما كان يعجب مديره ولا موظفين القسم. يسأل كثير، يقترح طرق جديده، وما يحب يمشي على نفس الخطوات لمجرد ان السبب "كذا تعودنا".
مع الوقت، المدير صار يقعد له على كل صغيره وكبيره، ويعتبر طريقته نوع من التمرد او قلة خبره.
وفي النهايه مديره اقترح للادارة العليا انه لازم يتم نقله إلى مكان الشغل فيه صعب لانه صاير متعب مع الموظفين اللي معه وماهم مرتاحين لطريقته اللي يبي يغيير كل شي.
وفعلا تم نقل عبدالله الى قسم الشكاوى لهدف انه ما يرتاح للشغل ويستقيل.
اول ما نقل عبدالله لقسمه الجديد، توقعوا إنه بيتعب. لأن القسم مليان بلاغات، متابعات، وردود متكرره، وحالات تتأخر بسبب كثرة الخطوات.
لكن الفرق إن مدير القسم الجديد ما حكم عليه من اول اسبوع. بالعكس قرر يسمعه.
عبدالله قال له: "ليش كل شكوى نمشي معها بنفس الدوامه؟ ليش ما يكون عندنا نموذج واضح من البدايه يحدد المشكله، الجهه المسؤوله، اخر تحديث، والخطوه الجايه؟"
المدير قال له: "جرب. ورني."
عبدالله رتب نموذج متابعه بسيط، وخلى كل شكوى تكون واضحه للموظف من اول نظره ويعرف على طول كيف يبحث لانه واضح له تفاصيل الشكوى: مين مسؤول عنها، وين وصلت، وش الناقص، وهل تأخرت أو لا.
بعد فتره قصيره، صار الفريق يتابع الحالات بشكل اوضح، وصارت اسئلة واستفسارات الموظفين بين بعض اقل، وصارت المشاكل المتكرره تبين بشمل اسرع.
الموظف اللي كانوا يشوفونه مشكله في قسمه الاول، صار في القسم الجديد واحد من اسباب تحسين طريقة العمل.
وش اللي تغير؟ اكيد مو عبدالله.
اللي تغير هو القائد: واحد كان يشوف اسئلته ازعاج، والثاني شاف فيها فرصه للتحسين.
أحيانا جيل Z ما يحتاج قائد يعلمه ويغيير شخصيته، لكنه بس يحتاج قائد يعرف يسمع قبل ما يحكم.
الخلاصه: لا تربي جيل Z، تعلم منه
انت تقودهم؟ ولا هم بيقودون المستقبل وانت بتتقاعد؟
القائد الذكي في 2026 مو اللي يخلي جيل Z يشتغل مثله. هو اللي يخلي نفسه يفكر مثلهم شوي.
مرونة + معنى + ثقه + وضوح. إذا وفرتها، بتزيد فرص انك تحصل على افضل شي عند موظف جيل Z.
وتراك اذا ما عطيتهم؟ بيروحون لمكان ثاني يعطيهم.
لان القائد الناجح ما يحاول يصنع نسخه منه في موظفين الجيال الجديده،;لكن القائد الناجح يتعلم كيف يستفيد من اختلافهم عنه.
تعليقات
إرسال تعليق
شكرا لمنحي جزء من وقتك الثمين