الموظف الذكي الكسول: ليش ممكن يكون أهم موظف في فريقك؟

الموظف الذكي لا يبحث عن المزيد من العمل، بل عن طريقة أذكى لإنجازه.

عندك موظفين بنفس المستوى الوظيفي ونفس المهام.

الأول: يجي اول واحد الصباح، ما يوقف شغل، يخلص شغله اول باول ما يتأخر ويبدا بالشغلة اول ما توصله، يرد على كل ايميل يجيه باسرع وقت، الكل يقول "ما شاء الله نشيط".

الثاني: يبدا يومه بهدوء، يشرب قهوة، ياخذ وقته بالتفكير، يسوي نموذج واحد ينفع للرد على اغلب الايميلات ويعدل شغلات بسيطة بكل ايميل، ويخلص نفس كمية الشغل بوقت اقل.

الأول واضح أنه مشغول والكل يشوفه كويس ومفيد.

والثاني واضح أنه يدور كيف يلغي الشغل من الأساس والاغلب يشوفونه مامنه فايده.

والحقيقة؟ الثاني هو اللي راح يخلي الفريق متميز و سابق الكل.

الموظف الثاني هذا اسمه: الموظف الذكي الكسول.

الموظف الذكي الكسول: هو اللي ما يبحث كيف يشتغل أكثر، يبحث ويهتم كيف يحقق النتيجة بأقل خطوات ممكنه.

وش معنى "ذكي كسول"؟ مو اللي ببالك

الناس تعتقد ان اي موظف كسول = موظف ما يشتغل او يتهرب من الشغل. وهذا غلط.

نوعية الكسل عند الموظفين دائما تكون نوعين:

1. موظف كسول قليل الذكاء:
هذا مصيبة. ما يبغى يشتغل وما يعرف يشتغل. يأجل كل شي لين تخرب.

2. موظف كسول ذكي:
هذا كنز. هو يكره الشغل المتكرر والممل، عشان كذا مخه يشتغل 200% عشان يخترع طريقة تخلص الشغل بداله.

فيه مقولة قديمة منتشره منسوبة الى بيل جيتس تقول: "أحيانًا الشخص الذي يكره التعقيد هو أول من يبحث عن أبسط طريقة لإنجاز المهمة."

الكسول الذكي ما يكره الشغل. يكره التعقيد والغباء بالشغل.

كيف تعرف ان عندك موظف ذكي كسول بالقسم؟ اربع علامات

العلامة 1: يسأل "ليش نسويها كذا؟" كثير

الموظف العادي ينفذ. الذكي الكسول يسأل. لأنه شايف الطريق طويل وممل بدون فايده، ويبغى يختصره.

العلامة 2: يكره الاجتماعات والاوراق الكثيرة

تقول له "عبي النموذج الفلاني". يقول "ليش ما نسويه أوتوماتيك؟". هو مو وقح. هو يشوف انك تضيع وقته بشي يقدر الكمبيوتر يسويه.

تقوله "بنسوي اجتماع عشان نتناقش بالنقطة الفلانية" يقولك "ارسلها ايميل اسرع". هو ما يتهرب. هو يعتقد انك تضيع الوقت وفي طريقة اسهل واسرع.

العلامة 3: يشتغل قليل وينجز كثير

ما تشوفه يركض طول اليوم. تشوفه جالس. بس آخر اليوم مسلم شغل 3 موظفين. لأنه اشتغل بمخه مو برجوله.

لأنه يعرف ان الحركة الكثيرة، الركض، الانشغال بالاشياء زي ماهي بدون تفكير، ابدا ما تخلي الشخص ينجز الشي الأهم، وهذه الفكرة تكلمنا عنها بشكل مفصل في مقال: "أنا مشغول" كذبة.. أنت مو مشغول، أنت قررت الانشغال بالأشياء الخطأ

العلامة 4: دائماً عنده اختصار

تلقى عنده ملف إكسل غريب، او يستخدم موقع محد يعرفه، موظف لازم عنده طريقة تخلي شغله اسرع. ودايم بيقول "أنا مسوي حركة تخلصها بسرعه".

لو عندك واحد كذا، لا تتضايق وتعتقد انه يتهرب من الشغل. احمد ربك انت عندك عبقري يخلي الشغل يخلص بطريقة اسرع، ولا تتردد تطلب منه يعلم باقي الفريق.

اربع طرق لفهم الموظفين من زاويتين: الذكاء والنشاط

فيه تصنيف اداري مشهور يجمع بين عاملين: مستوى الذكاء ومستوى النشاط. على الرغم من انه تبسيط ولا يعتبر قاعدة علمية لتقييم الموظفين، الا انه يساعد كثير بفهم الفكرة بشكل أوضح:

النوع	وش يسوي؟	وش تسوي معه؟
1. ذكي + نشيط	هذا النجم. يفهم بسرعة ويتحرك بسرعة. بس يحرق نفسه.	حطه قائد ميداني. عطه فريق. هو يحب الحركة.
2. ذكي + كسول (موضوعنا)	ما يحب يتحرك كثير، بس كل حركة محسوبة. يختصر شغل شهر بيومين.	حطه في مكان تحتاج فيه تحسيناو مكان فيه مشاكل تبي لها حلول وتبسيط العمليات. لا تعطيه مهام يومية. عطه مشاكل تحتاج حلول واعمال تبي تختصرها وتبسطها.
3. قليل ذكاء + كسول	ما يضر كثير. لأنه كسول فما راح يسوي كوارث. بس ما ينفع.	خله على شغل واضح و بسيط جداً. لا تعطيه الا مهام انت متأكد ان نتيجتها سهله وغير مؤثرة.
4. قليل ذكاء + نشيط (أخطر واحد)	هذا الكارثة. يشتغل 12 ساعة ويخرب كل شي بدقيقه بحماس غير مبرر. يخلق شغل زيادة.	أبعده فوراً عن القرارات. هذا اللي يورط الفريق وهو يضحك.

أغلب المدراء يقدرون رقم 1 ويعطونه ترقيات وحوافز، ويحاربون رقم 2.

والعكس هو الصحيح لان رقم 2 هو اللي يبني لك النظام اللي يريح رقم 1.

أربع انواع من الموظفين: الفرق بينهم لم تصنعه كمية الحركة والنشاط فقط، بل الذكاء و جودة التفكير وطريقة الإنجاز.

غلطة القائد مع الموظف الذكي الكسول

اغلب القاده ما يعرفون يتعاملون مع هالنوعية من الموظفين، وبالعاده يتصرفون معهم بطريقة خاطئه.

يعني مثلا القائد يشوف موظف جالس، يقول "انت ما تشتغل زي فلان النشيط". يعاقبة ويعطيه شغل زيادة.

يخليه يحضر كل الاجتماعات غصب. يلزمه بدوام 8 ساعات كاملة حتى لو يجلس فاضي بالمكتب.

لانه ما يعرف انه ذكي وفاهم بس كسول ما يدور الشغل.

وبعدين وش بيصير؟

هذا النوع من الموظفين على طول راح يستقيل لانه ما يتحمل اللي انت اجبرته عليه ولا يبيها اصلا. وبيروح لمكان ثاني بيلقى نفس الشغل بس الفرق انهم لو بيفهمون نوعيته ويستفيدون منه، ويعطيهم طريقة تختصر عليهم 6 شهور.

والقائد الاول اللي ماعرف يتعامل معه بيجلس مع موظفه النشيط اللي يسوي كل الشغل يدوي بنفس التكرار كل يوم وما عنده مشكله ويحسب نفسه بطل. وانت ما تدري انك اساسا متأخر 6 شهور.

انت ما طردت كسول. انت طردت مبدع.

كيف يقود القائد الفاهم الموظف الذكي الكسول؟ ثلاث قواعد

القاعدة 1: لا تعطيه مهام يومية ممله، عطه مشاكل

لا تقول له "دخل 1000 اسم". قل له "عندنا مشكلة ادخال الاسماء هي تأخذ 10 ساعات كل أسبوع، كيف تحلها للأبد؟"

المهام تقتله. المشاكل تحييه. هو يحب يكون البطل اللي يلغي الشغل الممل.

القاعدة 2: قيمه بالنتيجة، مو بعدد الساعات

لا تقول له "ليش جيت متأخر؟". قل له "الشغل خلص؟ ممتاز. كيف اختصرته؟ علمنا".

لو قيمة شغله بالحضور، بتخسره. لو قيته بالذكاء، بيجيب لك أفكار ما خطرت على بالك.

عطه حرية: "خلصها بطريقتك، المهم قبل الخميس". وشوف السحر.

وهنا تكون فوضت موظف التفويض الصحيح، حددت النتيجة المطلوبة والوقت المطلوب يخصل المهمة وعطيت الموظف مساحة يختار الطريقة المناسبة بدل ما توجع راسك وتدير كل خطوه عنه، وهذا تكلمنا عنه في مقال: فن التفويض: كيف تبني فريقا قويا بالثقة بدل الإدارة الدقيقة

القاعدة 3: خله يعلم الفريق طريقة الكسل الذكي

أخطر شي تسويه انك تخلي ذكاءه له لحاله. لو استقال بيروح وتروح معه كل الاختصارات والطرق اللي تخي الشغل اسرع.

قل له: "الاختصار اللي سويته، سوي لنا فيديو 5 دقايق يشرح للشباب كيف سويته".

هو كذا كسبان لأنه صار المبدع اللي علم الموظفين، وانت كسبت لأنك وفرت جهد و وقت على الفريق.

كذا حولت كسله الذكي إلى نظام للشركة كلها.

كيف تكشفه بالمقابلة؟ ثلاث أسئلة سهله ونتايجها رهيبة

لا تسأله "وين تشوف نفسك بعد 5 سنوات". اسأله كذا:

السؤال 1: "تكلم لي عن شغل ممل كنت تسويه واختصرته؟"

الموظف العادي بيسكت. الذكي الكسول بيتفاخر على طول وبيقول لك مثلا قصة كيف انه سوى اكسل شيت تعبيه ويطلع تقرير مرتب أوتوماتيك يوفر ساعات من التعبيه اليدوية. وهذا هو اللي بيفيدك.

السؤال 2: "لو عندك مهمتين: وحدة سهلة تاخذ يوم، ووحدة صعبة تاخذ 3 أيام بس بتلغي الحاجة للمهمة السهلة للأبد، وش تختار؟"

الاجابة بتخليك تعرف اذا المرشح يفكر بس في يخلص المهمة الحالية، او يبحث عن حل يمنع انها بتكرر مستقبلا. يعني مثلا النشيط قليل الذكاء بيختار السهلة عشان يخلص بسرعة. الذكي الكسول بيختار الصعبة. لأنه يكره التكرار.

السؤال 3: "ايش أكثر شي تكرهه بالشغل؟"

لو قال "ما اكره شي أنا أحب كل الشغل" فهذا يجامل. بس لو قال اكره "الاجتماعات بدون هدف، إدخال البيانات يدوي، الإيميلات المتكررة" فهذا ذكي كسول أصلي.

إذا كانت إجاباته من ها النوع، تاكد انه مرشح قوي ويستحق انك تتعمق اكثر في طريقة تفكيره وتاخذ معه وقت اطول وتسأله عن أمثلة ونتائج فعليه.

قصة واقعية: تركي اللي يشوفونه كسول لكنه كان يلغي المشاكل ما يحلها

تركي موظف تفقنية معلومات في احد المنشأت. كان مديره يشتكي منه "ان بس جالس ما يسوي شي، والشباب اللي معه يركضون".

استمر الوضع على هالحال فتره، تركي كسول ما ينتج والباقين ماشاء الله عليه.

مع الوقت تغير المدير، ومن حسن الحظ المدير الجديد فاهم.

ولاحظ ان تركي فعليا كسول وما يرد على تذاكر الدعم اللي توصله بسرعة، بس بالمقابل لاحظ شي اهم، وهو ان عدد التذاكر نسبتها اقل بكثر بالقسم اللي يشتغل فيه تركي، وايضا تكرار التذاكر على نفس المشكلة تقريا شبه معدوم مقارنة في باقي اقسام الادارة.

المدير مباشرة سأل تركي: "انت تشتغل غير الباقين، وش تسوي؟".

قال تركي: بكل برود "انا سويت بوت يرد على الاسئلة المتكرره من فترة، وكل ما لاحظت اي سؤال تكرر اضيفة. وكذا ما عاد فيه داعي ان احد يفتح تذكرة أصلا دامه بيلقى الاجابة فورا".

المدير طلب منه يخلي البوت هذا بكل الاقسام، وغير مكانه وحطه بإدارة الابتكار والحلول بدال ما كان في قسم الدعم.

الفرق هنا بقصة تركي ان المدير الاول كان يركز على عدد التذاكر اللي يقفلها الموظف، بينما ركز المدير الثاني على عدد التذاكر التي ما تتكرر من الأساس.

الاول كان يشوف تركي كسول مامنه فايده، والثاني اكتشف انه عنده كنز محد مستفيد منه.

الخلاصة: انت تحتاج فريق نشيط ولا فريق ذكي؟

تشبية او وصف بأسهل صورة:

الموظف النشيط قليل الذكاء: يخليك تحس ان الشغل ماشي، بس هو كانه قاعد يحفر حفرة بملعقه.

الموظف الذكي الكسول: يجيب شيول ويخلص الحفرة بساعة وينام.

دايم ابحث عن الكفاءة، الاختصار، والتفكير في تحسين العمليات لانها اهم للعمل من مجرد الظهور المستمر بمظهر المشغول.

القائد الفاهم ما يحارب الكسول الذكي. القائد الفاهم يستثمر فيه.

دور اليوم بفريقك. بتلاقي واحد الكل يقول عنه "ذكي بس كسول".

روح له. وقل له: "عطني أصعب شغل تكرهه، وقل لي كيف نلغيه للأبد؟"

وبتشوف من هو الموظف اللي فعلا شايل فريقك.